قوانين امتلاك الدرون بالمغرب

 

موضوع اليوم هام بزاف… فكرنا نقادوه ونشاركوه معاكوم لتعم الفائدة، وأيضا باش نوضعو حد لواحد العدد كبير ديال التساؤلات اللي كايطرحوها بزاف ديال الأعضاء في العديد من المجموعات بحال المجموعة المباركة ديالنا

على بركة الله.

كيفاش وعلاش الدرون Drone ممنوع في المغرب؟

بزاف ديال الناس كايسولو واش يقدرو يكومونضيو درونات من شينوا، و واش غادي تشدهوم الديوانة، و و و … وبزاف ديال الأجوبة كاينة، ولكن ماكاينش شي جواب شافي…

اليوم غادي نحاولو ما أمكن نقتربو من الإجابات النهائية من خلال الرجوع لمصادر على شبكة الأنترنت

المعلومات اللي غادي نتداولوها هنا المصادر ديالها :

موقع الجمعية المغربية للدرون Association Drone Maroc . العنوان ديالها : http://dronemaroc.ma

بعض المواقع الصحفية الموثوقة المغربية منها والفرنسية أيضا.

قبل ما نطيرو بعيد بالدرون، نحاولو نعرفوه…

الطائرات بدون طيار أو الدرون Drones هو واحد النوع من المركبة الطائرة، بدون طيار، يتم التحكم فيها عن بعد من خلال تيليكوموند خاصة، وهي كانت ظهرات لأول مرة خاصة بالاستعمال العسكري (بحال أي تكنولوجيا فالحقيقة!!!). المهام ديال هاد الدرونات هي الاستطلاع وذلك من خلال التقاط صور و فيديوهات جوية لمنشآت ومناطق حساسة …وكملو من راسكوم.

من بعد بان مايسمى بالدرون “المدني” Drone civil اللي تقدرو تستنتجو بسهولة أن الاستعمال ديالو ماشي عسكري، ولكن لممارسة هواية الملاحة الجوية (زوينة هاد الملاحة ههه) وكذلك التقاط صور وفيديوهات… وهنا منين بدا المشكل!!!

ملاحظة 1 : الدرون فيه زوج أنواع : مول الفرفارات multi-rotors. (هاداك هو اللي كانعرفوه بزاف وكلشي باغي يشريه ماعرفناش علاش ههه) ومول الأجنحة (هاداك كايحلق على ارتفاع عالي ويقدر يقطع مسافات طويلة).

ملاحظة 2 : بالنسبة للقانون الفرنسي، الدرون إيلا فات 800 غرام، كايخص مولاه يدوز واحد امتحان QCM en ligne وخاص يكون فيه ضواو كايسنيو باش يتشاف. ويلا فات الوزن ديالو 25 كيلو ، كايخصو يتسجل ب immatriculation بحال شي موطور ولا طوموبيل، ويكون مصادق عليه homologué ، ومولاه يكون عندو brevet. فيلم باكستاني هذا هههه!!!

واش كاين شي قانون كايحدد وكاينظم استعمال الدرون؟

فالخارج : موجودة ترسانة مظبوطة ديال استعمال الدرون، كاتحدد شروط حيازة هاد اللعيبات، وكاتنظم الاستعمال ديالها، خاصة وأنها كاتولي تبرزط ناس أخرين… نقدرو نرجعو نكتبو عليها من بعد.

فالمغرب : عنداك تكول مع راسك راها سايبة ههه… لا آخالي، كاين قانون وتعلن عليه فالجريدة الرسمية Bulletin Officiel بتاريخ 23 فبراير 2015… باقي أخضر، عرفت ههه!

هاد القانون آسيادنا كايكول باختصار أن الحيازة ديال الدرون خاصها ترخيص Autorisation من عند السلطات المختصة، واللي كاتجي على راسها الداخلية. معلوم، بما أن الاستعمال ديال هاد الطائرات يقدر يتضمن أخطار من قبيل تهديد الأمن العام والترابي. هذا من جهة. ومن جهة أخرى، كايهدد الحرية الشخصية ديال بنادم… بلا ما نهدر على خوتنا فاش كاتطيح فيديهوم شي تكنولوجيا بحال هادي…

أول حاجة كايفكر فيها هي يتفرج فبنت الجيران كاتنشر الحوايج فالسطح، و كمل من راسك…

شكون يقدر يحصل على رخصة ديال درون؟

خاصك تكون مهني professionnel باش تقدر تخرج رخصة تخدم بداك الدرون في إطار العمل ديالك. كايدخل في هاد الإطار:

العاملين في مجال الإعلام : الصحافة، صناعة الأفلام، وكالات التواصل Agences de communication، وما شابه ؛

بعض الإدارات اللي كاتحتاج الاستعمال ديال هاد الماتريال…بحال الفلاحة، الصيد البحري، الوقاية المدنية، … هاد الناس يقدرو ايستعملو الدرون فالمراقبة ، في الوقاية، فالتدخل السريع،… موجود مايتدار…

للإشارة، الرخصة كايخصها تتجدد سنويا يعني كل عام أ عمي، ومع ذلك، فوسط العام فوقت ما تبغي تخدم بالدرون المرخص كاتطلب رخصة عاودتاني من عند السلطة المحلية (القيادة).

إيوا ياك أنا سيفيل، وداك الدرون سميتو “سيفيل”… إذن نقدر نشريه…

جرب و شوف!!! راه ماشي غير بغاو يمنعوك وصافي، رأه غير كاين قانون توضع باش يخدم المصلحة العامة بالدرجة الأولى. إيلا كنتي فيك واحد من هاد الشروط اللي ذكرنا ، مرحبا…

واخا… ويلا لقاو عندي درون؟

إيلا وصلك شي درون من برا، وشداتو الديوانة غادي يعيطو ليك ويسولوك : كاين شي طوريزاسيو؟ إيلا لقاوها هز طيارتك وخرج (ولكن بلاتي، ماتخدمهاش حتى نقوليك فوقاش…صبر هانا راجع!). إيلا مالقاوهاش : السيزي، ويقدرو يضربوك بشي غرامة محترمة (سمعت شي “بركة” أي عشرالاف درهم)، ولا قدر الله، اعتقال ومحكمة…يا لطيف!!!

إيلا كان عندك درون قبل مايخرج داك القانون اللي هدرنا عليه الفوق، ضروري من السلطات المحلية حداك تعرفو، ويا تخرج ليك رخصة، يا تحيدو ليك!

إيلا شي توريست جاي داخل وجايب معاه درون، مايخليوهش يدخل بيه. يقدرو يجرجروه، ويلا عندو شي زهر وديكلاراه قبل ما يدخل للتراب الوطني، يخليوه عندهوم معزز مكرم ويعطيوه reçu حتى يكون راجع وياخدو في أمان الله.

ولكن علاش بنادم شرا درونات صغيورين ودخلهوم…؟

آه، كاتهدر على دوك قشاوش ديال عيشورة؟؟؟ الدرون باش يولي كايشكل خطر كايكون عندو مواصفات معينة، ويقدر يهز كاميرا، وبالخصوص، يكون كايوزن فوق من واحد القدر معين ديال الغرامات… راه هدرنا الفوق على كيلو قل ميتين.

وزيدك، والله و فكرتي تغير المعالم ديال داك اللعبة، وتردها كاتصور وكاتتيري القنبول و و و… والله و حصلتي راك عارف…

واخا، منين ناخد الرخصة باش نشريه؟

راه كلنا ليك خاصك تكون مهني، عاقل؟ ماعليناش… كاتمشي لعند الوزارة المنتدبة المكلفة بالتجارة الخارجية، واللي كاتنسق مع الداخلية، وتقدر تدخل فيها حتى الوكالة الوطنية لتقنين المواصلات ANRT …

(هادي تابعانا فالتيليفونات، فالويفي، وحتى فالدرونات…؟؟؟)

لا آمولاي، دايرة خدمتها، من حيث الدرون فيه موجات ديال الإرسال…

إيوا دابا أنا ماغاديش نحقق الحلم ديالي نولي طيار بلا ما نطير؟؟؟

إيلا بقيتي كاتطير غادي تجيبها فعظيماتك!!!

ولكن عقلتو منين قلت ليكم جبت هاد المعلومات كاملة؟؟؟

كاينة جمعية ديال الدرونات… والجمعية قانونيا كاتدخل في خانة المؤسسات الرسمية اللي معترفة بها الدولة…يعني تقدر تخرج رخص للأعضاء ديالها باش يستعملو الدرون فشي حاجة ماكاتعارضش القانون!!! مثلا :

مسابقات فقيادة الطائرات من نوع الدرون في إطار تعليمي محض، بتنسيق مع السلطات المحلية، بحال الجوندارم ؛

تصوير تظاهرات فنية، ثقافية، … بالدرون، في إطار أشغال الجمعية، ماشي لأغراض شخصية…(نسا العرس ديال خوك الكبير ولا بنت خالتك )

#asdafar