حضي ‏راسك ‏من ‏النصابة

⛔️من الطرق المستعملة التي يستخدموها النصابون في مجال العملات الرقمية للنصب على الضحية .... يرحى الحذر للاشخاص الجدد و الاشخاص الذين لم يتعاملوا عن طريق بنك CIH 

الإخوان الناس ولاو كيحاولو يستغلو واحد الطريقة باش أنهم ينصبو على الناس عن طريق بنك CIH.

الطريقة كتستاغل أكثرية مع الناس اللي كادير البيع والشراء :

القضية وما فيها فاش كادير مع النصاب أنه يخلصك كيطلب ليك الرقم ديال الحساب ديالك ديال CIH ورقم الهاتف.

رقم الحساب باش أنه يصيفط ليك فلوسك للحساب ديالك والنمرة كيستغلها بطريقة آخرى.

كتسائلو دابا فين كاينا عملية النصب هنايا 🤔

أجي نكملو باش تعرف...

نقولو مثلا درتي مع النصاب أنه يخلصك 1000Dh.

هاد النصاب فاش كياخد منك هاد المعلومات كيصيفط ليك رسالة مزورة للهاتف ديالك بإسم CIH باللي راه لفلوس دازو للحساب ديالك بنفس الرسالة اللي كتصيفط ليك CIH بأنه وصلوك لفلوس للحساب ديالك عن طريق واحد الأسلوب اللي سميتو SMS Spoofing.

اللي معارفش شناهو SMS Spoofing :

هي واحد الطريقة اللي كتخليك تصيفط رسالة اللي بغيتي لأي رقم بغيتي بإستعمال رقم أو الإسم اللي أنت بغيتي يظهر عند الضحية.

نرجعو دابا للموضوع ديالنا...

ومن بعد ما النصاب كيصيفط ليك الرسالة للهاتف ديالك كيمشي للحساب ديالك ديال CIH وكيحاول يدخل للحساب ديالك عن طريق رقم الحساب اللي عطيتي ليه باش أنه يبلوكيه ليك لشي 24h من مورا 3 ديال كلمات السر اللي كيكونو غالطين.

وهادي كتخليك أنك متقدرش مزال دخل للحساب ديالك وأنك تشك أنه نصب عليك وفديك الساعة غادي تصيفط ليه السلعة اللي خدا من عندك حنت غادي تكون تايق بديك الرسالة المزورة اللي وصلاتك في الهاتف ديالك.

====

هاد الطريقة تقدر تستعمل مع أي بنكة آخرى إلى كانت كتخدم بنفس الطريقة.

====

شكرا لأنك قريتي الموضوع، نتمنى تحضي راسك من بحال هاد الطرق وإلى عجبك واستافدتي منو متنساوش تخلي الرأي ديالك عليه في التعليقات ✌️