اجي ‏تفهم ‏شنو ‏هي ‏العملات ‏الرقمية ‏

مكين تاحد مسمعش هاد الأيام بالعملات الرقمية، CryptoCurrency و كيفاش دارت البوز وكلشي تيهضر عليها، اليوم غنهضرو على هاد البلان ونشوفو كيفاش قضيتو.

أولا لي ما تيعرفش معنى الفلوس وكيفاش تيجيو كيفاش تيطبعو شنو تعيطيهم القيمة ديالهم، كليكي على سميتي وقلب غتلقا موضوع خاص ومفصل تيشرح هادشي.

ثانيا العملات الرقمية هي مجرد "محفظة على الأنترنت فيها أرقام".

ديك المحفظة باش تصاوبها بحالي كتصاوب كونت جيميل ولا آوتلوك ولا حتى فايسبوك.

ولكن المشكلة كيفاش غتعرمها بهاد الأرقام.

كل محفظة عندها سمية، كاينة لي كتسما Bitcoin، Ethereum، Litecoin، Cardano ... وأسماء كثيرة.

باش تعمر هاد المحفظة ديالك بالأرقام، فراه تماما بحالي أتعمرها بأي فلوس، إما تبيع وتشري شي حاجة وتخلص بهاد العملات، ولا أنك تساهم فالإنتاج ديال هاد العملات.

إنتاج هاد العملات تيحتاج أجهزة حاسوب مجهدين وإستهلاك كبير للطاقة، وبالتالي الناس لي تينتجو هاد العملات عن طريق القيام بعمليات حسابية معقدة، فراهم تيديرو هادشي فدول لي فيها ثمن الكهرباء نااقص. وإلا بغيتي ديرها فالمغرب، أتستهلك كميات طاقة أكبر من قيمة داكشي لي غدير ليه الإنتاج.

كيفاش كيدار لهاد العملات الإنتاج (التعدين)؟

كل عملة وكيفاش عندها الطريقة ديالها، تقدر تقلب فاليوتيوب على حسب العملة، في الأخير البيسي ديالك هو لي تيدير العمليات نتا غير كتعطيه الأمر باش يبدا فالتنفيذ. وكيف قلت ليك إلا كانتي فدولة فيها ثمن الكهرباء غالي بحال المغرب فالعملية لا تستحق حتى المحاولة. وغتخرج غير على البيسي ديالك.

أشنو نقدرو نديرو بهاد العملات ؟

نفس الشيء لي تقدر ديرهم بالفلوس العادية، غير هو حاليا ميمكنش ليك تشري بيها شي حاجة من أرض الواقع، لحقاش المتاجر لي تيقبلو الدفع بهاد العملة قليلة جدا. وكتقتاصر التجارة بهاد العملات فقط في الأنترنت،

أشنو الميزة فهاد العملات ؟

الميزة لي خلات هاد العملات تنتاشر فالبداية، هي أنه تحد ما تيعرفك شكون نتا لي وصلوك الفلوس ولا لمن غتصيفط الفلوس، وبالتالي كتوفر ليك واحد الحماية كبيرة من مراقبة أجهزة المراقبة لي كتراقب إنتقال الأموال، كذلك كتوفر ليك واحد الميزة وهي توحيد العملة، بحيث ممحتاجش تبدل العملة باش تشري شي حاجة نفس العملة تشري بيها لي بغيتي فأي بلاصة فالعالم بحال الدولار تقريبا.

واش سوق العملات الرقمية سوق مربح ؟

ناخدو مثال عملة Bitcoin . بما أنها أقدم وأول عملة رقمية، فالبداية كانت قيمتها متدنية وتحد ما مسوق ليها، ولكن لحقاش الهاكرز والناس لي كدير randsome أو الفدية، باش يحركو التجارة ديالهم بلا ميحتاجو يشدو فلوس حقيقية لأن الفلوس الحقيقية غتكشفهم وتخرجهم من الجحر ديالهم، حتاجو لهاد العملات، لي سهلات عليهم الرواج ديالهم في السوق السوداء، وهنا فين الطلب ديالها بدا تيزيد، وبالتالي إلا زاد الطلب كتزيد القيمة وبالتالي الثمن ديالها، ولان كمية الBitcoin, محدودة، بحيث حاليا كاينة فقط 18 مليون بيتكوين، داكشي علاش البيتكوين واصلة ل 33 ألف دولار للبيتكوين الواحدة حاليا.

وبالتالي فسوق العملات الرقمية خاضع تاهو لقانون العرض والطلب، وكل ما كانو الناس بزاف طالبين هاد العملات الرقمية كل ما الثمن تيطلع.

الناس لي ربحو من العملات الرقمية وخصوصا البيتكوين هوما الناس لي كانت عندهم منها بزاف فاش كان الثمن ديالها قليل، بحيث شراوها بمئات الدولارات ودابا راهم ناعسين على ملايين الدولارات.

إلا ان هاد السوق جد متقلب، فمؤخرا وفي ظرف شهرين فقط نزل ثمن البيتكوين من 65 ألف دولار للبيتكوين الواحدة إلى 33 ألف دولار، وهذا راه هبوط كارثي على بزاف المستثمرين لي شراوها وهي ف 65.

ومحد دول العالم المتقدم، بحال أمريكا وأوروبا واليابان لي عندهم العملة الصعبة ما كيتعاملوش بيها وتيرفضوها لانها ممبنياش على شي حاجة متينة، فأكيد أن العملات الرقمية كتبقى حاليا مجرد فقاعة لي تقدر تنفاجر فأي لحظة والقيمة ديالها تنزل للحضيض والناس تضيع فرزقها.

أما إيلون ماسك والقضية لي دار ديال شراء البيتكوين، فهي عملية مشبوهة خلات بزاف الناس تستثمر فيها وبالتالي خسرو بزاف الفلوس بسباب هاد العملية لي دار، لأنها في الحقيقة مازدتش طلعات قيمة البيتكوين ولكن في الحقيقة نزلاتو. خصوصا فاش بانت الشائعات أول مرة أن الشركة غتخلى على هاد العملة.

واش تنصحني نتعامل فيها ؟

إلا عندك فلوس شايطين تقدر تجرب. أما باش ديرها مشروع وتحط فيه فلوسك فلا. والناس لي تيربحو من تداول العملات هوما فقط الناس لي سنوات فالدومين أو هذا هو الضومين ديالهم وديال حياتهم، نتا جديد فالضومين صعيب وصعيب بزاف تربح بلا ميمشيو ليك فلوسك كلهم، لأن القضية بالنسبة للجدد أشبه بالقمر... بحكم أن تداول العملات شي حاجة لي بحر ديال المسائل لي خاصك تكون مطالع عليهم، ماشي فقط عملية بيع وشراء بسيطة. ولكن القضية معقدة بزاف.