عقد الشغل أو العمل هو أهم رابط بين المشغل و العامل وكيكون فيه الحقوق و الواجبات لكلا طرفي العقد و هما المشغل و العامل

. مهم هذا شرح مبسط لجميع أنواع العقود contrats de travail لي كاينين فسوق الشغل المغربي : 

✓ عقد عمل دائم CDI : هادي أحسن كونطرا و هي الأصل و هنا كاتسمى موظف مرسم . و هنا الأكثرية حتى كاتكون دزتي من كونطرا CDD و لا ANAPEC عاد كادوز ل CDI ، قليل الشركات لي كايديرو عقد CDI من اللول . مهم ، فهاد العقد كايمكن للعامل يفسخ العقد فوقت ما بغا و لكن بموافقة الطرفين ( المشغل و العامل ) عن طريق إشعار خطي و لا لفظي . 

و عندك جميع الحقوق ديالك : cnss ,assurance ,و التعويضات .

✓ عقد عمل محدود المدة CDD : من بعد ماكتسني هاد العقد كاتلتازم بالشروط ديالو للمدة لي مكتوبة فيه و فاش كاتسالي داك المدة كاتسالي مع داك الشركة نتا من جيه و المشغل من جيه، و كاتمتع بالحقوق ديالك كاملة بحالك بحال أي واحد مرسم فداك الشركة عندو CDI، بحال تاخد الكونجي ديالك ، الأعياد ديالك، الغيابات القانونية و أي حاجة كايضمنها ليك المشغل ( cnss ...و كلشي كايكون عندك ناضي غي هو تكمل للمدة ديالك المحددة في العقد السلام عليكم ) .

الحد الأقصى ديال هاد العقد هو 12 شهر يعني ممنوع تسني كتر من هاد المدة، و نزيدك الشركة عندها الحق تجدد معاك غي مرة وحدة يعني مثلا تخدم عام CDD و تجددو عام آخر CDD صافي و من بعد لكونطرا ديالك خاص يدار ليها التأهيل requalification يعني لكونطرا خصها تحول ل CDI و القانون هو لي كايضمن ليك هادشي و لا مابغاش المشغل ديالك يبدل معاك لكونطرا كاتقدر ترفع عليه دعوة قضائية و كايعطيك من بعد التعويضات. 

الشركة كادير هاد النوع ديال لكونطرا لعدة ظروف لي هي :

- تعويض عامل : غياب عامل ( مرض و لا ولادة و لا أي سبب) يعني نتا/نتي كاتعوض واحد العامل غائب . 

- الزيادة المؤقتة في الإنتاجية : هنا الشركة كاطلع ليها الإنتاجية و كاتولي محتاجة عمال فداك المدة بالضبط . 

- الأعمال الموسمية : بحال الفندقة و لا الفلاحة ...

- التجديد في العمل : بحال الشركات لي عاد باديين و عندهم الشك فالبداية واش الشركة غادي تنجح و لا لا و كاتولي تخدم العمال لمدة محدودة . 

الالتزامات لي ضروري خاص المشغل يضمنها للعامل : كاينا cnss و assurance و كاين التعويضات . 

✓ عقد Intérim : هي فالأصل دايرا بحال CDD غي هي كاتكون بين جوج ديال الشركات ، بمعنى أنه كاينا كونطرا بين شركة و الشركة لي نتا خدام معاها و كونطرا بينك نتا و بين الشركة لي مخدماك ، يعني نتا ماكاتكونش عندك علاقة كبيرة بالشركة لي مخدماك ، الإختلاف كاين فالمدة هو أن هاد النوع ديال العقد المدة القصوى ديالو هو 3 أشهر و الحق في التجديد مرة واحدة . هاد العقد الأكثرية كايكون موجه لليد العاملة . 

الالتزامات لي ضروري خاص المشغل يضمنها للعامل : CNSS ، assurance ، التعويضات .

✓ عقد ANAPEC : هادي هي العشق ديال الشركات، فهاد العقد المشغل ماكايخلصش على العامل الإقتطاعات فيما يخص CNSS و assurance و التعويضات، يعني أتخدم بلا حقوق بحال لي دايرينك stagiaire ، و لكن كاتستافد من جوج حوايج : التغطية الصحية الإجبارية AMO ، و كاتعفى من الضريبة على الدخل IR صاافي. هاد لكونطرا يلا خدمتي بها فشي شركة لمدة كاتقل على 6 أشهر و خرجتي من الخدمة عندك الحق فكونطرا أخرى anapec و لا فتي 6 أشهر مع ديك الشركة ماكاتعودش تخدم بديك كونطرا anapec واخا يجريو عليك غي نساها . 

✓ عقد مهمة contrat de mission : هاد العقد خفيف ظريف ، هاد لكونطرا كاتكون محكومة بمشروع، مثلا شركة باغا تبني شي حاجة بحال تبني شي معمل هاد المعمل غايسالي مثلا منهنا لعام و لا ممكن يولي عاماين و لا ممكن يولي ف 3 سنوات مهم نتا كاتبقى خدام حتى كايسالي داك المشروع . 

قبل مادفعو لشي خدمة قراو مزيان الشروط و بالضبط شوفو إنا عقد بغاو يديرو معاكم داك الشركة و الله يسهل على الجميع 🌹