كيفاش نعمر الشيك بطريقة صحيحة و شناهيا الامور الي من الضروري نكتبها باش يكون شيك صالح و قابل للصرف ؟

,

طبعا معانا اشخاص سبق ليهوم تعاملو بالشيك و تيعرفو كيفاش يكتبوه لكن كنأكد ليكوم انه تا نتوما غادي تستافدوا من المعلومات الي غنتشاركوها فهاد المنشور.

اذا على بركة الله اول حاجا كنكتبوها فالشيك هي المبلغ بالارقام  و الي هو من الضروريات ويلا شفتو الصورة غادي يبانو ليكوم الضروريات بالاحمر و الكماليات بالاسود .. المبلغ لابد يكون مكتوب بشكل جيد و افضل طريقة هي تبدا بعلامة # ثم المبلغ بعدها تغلق ب # مثال. : #5000.00# بهاد الطريقة ميمكنش  يتغير المبلغ نهائيا.

ثانيا المبلغ بالحروف و الي الدور ديالو تأكيد المبلغ المكتوب بالارقام و الي  مهم جدا تتأكد منو حينت الى كان اختلاف بسيط غادي يترفض ليك الشيك مثال : درتي فالارقام #5000.00# و فالحروف خمسون الف درهم .. فهاد الحالة يكون الشيك ملغى و ماغاديش يتخلص .. و اهم حاجا ممكن اي واحد يغفل عليها هي كلمة (درهم) الى كتبتي غير  ( خمسة ٱلاف )  و نسيتي كلمة درهم فالشيك كذلك غير قابل للاستخلاص.

ثالثا التاريخ و الي الدور ديالو تا هو مهم و ليس اعتباطي  .. واش عارف انه الشيك يصبح غير قابل لاستخلاص الى دازت على التاريخ المكتوب فيه سنة و 20 يوم ؟ يعني يلى مشيتي للبنك و خديتي شيك فيه تاريخ قديم بهاد المدة فماغاديش يخلصوه ليك وبالتالي رد البال مزيان مع التاريخ.

رابعا التوقيع و الي النصيحة الوحيدة الي عندي انه تقرى واحد العبارة صغيرة تحت مكان التوقيع مكتوب فيها ( يجب ألا يصل التوقيع الى الحيز أسفله ) يعني ميوصلش لديك الباندا البيضاء فالاسفل .

هاكا نكونو سالينا من الضروريات .. الكماليات هي المدينة الي غادي يتصرف فيها و معندهاش اهمية كبيرة حينت ممكن تكتب فيه مراكش و يتصرف فطنجة الدور ديالها هو فحالة النزاع كتلتاجئ للمحكمة التجارية ديال المدينة الي مكتوبة فالشيك

بالنسبة للحيز ديال اسم المستفيد فهنا كاين النقاش فحالة كتبني فوق الشيك حرفي NE او كلمتي non endossable  فهادا يعني انه ميمكنش شي واحد اتخلص من هاد الشيك من غير الشخص الي كاتب الاسم ديالو فديك البلاصة .. ويلا  مكانتش   NE مكتوبة فالبنك مكيعطيش لاسم المستفيد اهمية و الي جاب الشيك غادي اتخلص فيه. 

 و اخيرا غادي تلاحظوا فالقنت ديال الشيك علامة على الشكل التالي // و معناها ان الشيك باري chèque barré ويلا كانت موجودة فالشيك فميكنش للبنك يخلصو ليك كاش و انما لابد تدفعوا فالحساب البنكي ديالك و تسنا حتى حتى يدخلو ليك الفلوس.

هنا نكون قد انتهينا من الشرح, كنتمنى تكونو ستافدتو معانا و خلي لينا تعليق فيه المعلومة الي مكنتيش عارفها من قبل او اظافة من عندك للإفادة و الاستفادة