الفرق مابين انواع التسميات ديال القهوى ليكيكونو في لوائح المقاهي وكيفاش يفرق بيناتهم

 .. انا غادي نعطي نبذة بسيطة وهادشي هو ملخص دون الدخول في التفاصيل .. المهم خاص تعرف هاد المعلومات الاساسية ..

النوار فيها ثلاث القياسات بثلاث اسماء : 

❤الطاليانية : 

كيجيب لك العصرة الأولى الاساسية ديال داك القدر ديال القهوة لي دار في البريصة في داك الكوپ مطحونة .. يعني اول القطرات ليكيخرجو منها من الضغطة الاولى كيعطيوك قهوى pure .. غالبا كاتكون غير شويا في كأس V وكاين لي كيسميه كأس "طاليان" .. هاد القهوة خاصة بالكماية لي كيضربو القاصح وماكيكثروش وكتشرب ديما مسوسة لانك عمرك تجيب عبارها في الحلاوة واخا تعواج .. يعني جوج غوارو تال ثلاثة .. يجيبو مزاجهم ودوز حايد .. وهي ديال تضربها الصباح من بعد ما تفطر باش يتحلو عينيك .. 

❤النورمال : 

هي غالبا لي مزيانة في هادشي كامل لانه على حساب البارمان وكيفاش كيتعامل في العصرة ديالها وهي ليتقدر تعرف بها الكاليتي واش كاينة ولا لا .. كاين لي كيخلي العصرة الاولى تسقطر على خاطرها حتى كاتعمر ليك الطاس ولا كأس طاليان وكاتبان لك من لاموس ديالها (التاج ، الرغوة ) بانها نقية .. والغشاشين فيها كاينين لي كيدفعو لها شويا البخار باش يهبط معها شويا الماء باش ماتكونش خاااترة بزاف وبزربا تعمرليه الكاس ويدفعها لك .. هاد النوع خاص بالكماية ليكيسفو بزاااااف ديال الغوارو ولا ديال شي واحد كيقرا وكيبغي يشد الستون وما مزروبش ولا ديال الجلسات الغرامية لي كيكون فها النقاش حامي وكتبغيك تبقى متيقظ .. كاتشربها بالشويا عليك وغالبا ماكتكونش حارة الا اذا كيف قلت لك خلاها البارمان تسقطر على راحتها أو اذا كانت البريصا اوطوماتيك .. يعني في النورمال فين كتبان شطارة ديال البارمان .. وبالنسبة للسكر عندك ما بين نصف طوبة تال طوبة سكر .. أو حبة ساكارين وحدة .. اذا زدتي على هذا القدر سمح ليا ولكن غادي نقول ليك غير نوض فحالك لانها اهانة للقهوى على العموم ..

❤الأميريكان : 

هي ليكيقولو لها "ألونجب" أو "ليجيغ" التاريخ ديال هاد القهوى مرتبط بالناس ليكيبغيو القهوى ولكن ماكيبغيوهاش تكون قاصحة وبيهم غير المذاق ديال الكافيين يحيدو به القطعة وغالبا مكيبغيوهاش تسهرهم .. هادي كاتكون في كاس كبير شويا ولا طاس ديال نص نص وكاين ليكيعمر بها كأس عادي .. كاتكون جارية و ألونجي .. كيبان ليك القاع ديال الكاس كعما غامق بزاف وفيه اللون بحال ديال كوكا مايل للحمورية من التحت .. هادي غالبا كياخدوها البنات ومانصحكش بها لانه ما قهوى ما والو .. الا اذا مالقيتي ماتشرب وكنتي شارب قهوى وبغيتي غير تشربها باش تكونصومي وصافي .. ولا اذا كنتي كمااااي متهور وخاصك باش تلصق الباكية ولا نصها .. 

❤كابوتشينو :

هو كافي كريم بالشكلاط وشي مرات كاين ليكيدير فيه الكريم فريش باش تطلع الرغوة ويشد فيها داك الشكلاط ليكيزيدو ويبقى عاطي المنظر  .. هي ديال التبعصيص وشدان الستون في القهاوي الكلاص وفي سطارباكس وما جاورها .. طلبها نهار يكون دايز لك الصالير وعارض على صاحبتك ومافيك لي يشرب النوار .. 

❤كافي_كريم : الحليب ونقطة ديال القهوى لي كاتشيط من النورمال .. غالبا كيشدوها البنات .. ولا كاتشدها انت باش تفطر تضرب معها بتيبانة وتنوض نايض 

❤مهرسة

 هي القهوة غالبة على الحليب .. يعني كاس قهوى شويا ألونجي وكادير فيه شويا الحليب الفوق اقل منها .. وسميتها مهرسة لانك كاتهرس مذاق القهوى بالحليب ..

❤السبيسيال 

 هي القهوة كيتزاد فوقها الحليب وكيتعصرو فوق السكر نيشان .. مانصحكش بها نهائيا غير ديال مالين الشقوفة .. وشخصيا كتجيب ليا التبويعة غير بمجرد نشم ريحتها ولا نشوف شي واحد واخدها ..

شرب القهوى كاين فيه وفيه .. كاين القهوى ديال كل مقام .. كاين القهوى ديال الماتشات .. قهوى ديال وقت الخدمة ولا القراية .. كاين القهوئ ديال مع المادام كتناقشو شي موضوع شائك .. كاين القهوى ديال خارج تقرا ولا شاد شي كتاب تثقف نفسك .. كاين القهوى ديال الكماية كيبغيوها في شكل .. وكاين القهوى فاش كتبغي تبقى صولو منعزل على بنادم .. تقدر تجيك هاد القضية عجيبة ولكن قدما احتكيتي مع القهوى وقريتي عليها غادي تعرف انها اكثر من مجرد مشروب .. فلسفة القهوى ماشي اي واحد عاطيها الاهتمام .

نصيحة : عمرك تشرب النوار وكرشك خاوية ضروري ما تكون فاطر باش ماتصدقش مپلونطي لينا من معدتك .. وعمرك تكثر السكر ( هضرة بووووحدها هنا)  .. ومنين تكون كاتشرب النوار مرة مرة شرب الماء دير بحالا تمضمض به فمك باش ما يترباش ليك الكالكير بين سنانك ولحم سنانك ما تأثرش فيه القهوى ..  ❤🙏

By : agramine abderrahmane